Inuuninni iluaqutiga: Timersorneq

Silattoramali eqqaamavara timersorneq aallutaralugu. Angajoqqaagut ilagalugit timersoqatigiilluta, ilaqutariit allat unammeqatigalugit. Meeqqat allat aneeqatigitillugit timersornertalimmik aliikkusersortut ilagissallugit nuannarinerusarlugit.

Taava ilinniarnerma nalaani, timersorneq piffissaqarfiginagu soqutiginalugu inuulersimavunga. Kajumeriunnaavillugu timersulaarnissaq, misiliisaraluarlunga aallutaqalerusullunga kisianni naamiivik iluatsissinnaanngitsumik. Soorunami sungiusarneq piffissaritinneqartoq ataqqillugu naallugu ilaasarpunga, fitness-miikkaangamalu naammassitseeqqaarlunga ingerlanaveersaartarlunga. Uffalu soqutiginngiivillugu. Ukiut arfinillit timersornikuunanga eqqissillunga aallartisaqqillunga piumassusinikkiartoqqippunga, sivitsunngitsorlu timersuutit marluk aallutarilerlugit. Maannamut timersorneq inituupilussuusimavoq, sapaatip akunneranut minnerpaamik sisamariarlunga sungiusartarlunga.

Maannakkulli naartuninni puakka assut matoqqasutut ikkamik, sungiusarneq ingerlatinngilara naak timersulaarusuttaraluarlunga. Pujortartarallaramaluunniit timersortillunga puakka taamak sukataartiginikuunngillat. Qummukajaakkut pisuinnarlungaluunniit qasusarpunga soorlu akunnerpaaluit sungiusarsimallunga. Taavalu tigummiaqarlunga majuartarfikkut majuaraangama aamma taamatulli qasusarlunga, anerneerutingajattarlunga. Taakku eqqaavakka uunga piniarlunga: Timersorneq inuummarissaatitut pigilernikuullugu pingaartillugulu ulluinnarni, maannakkullu timersulaapajussinnaananga assut sunniuteqariartortoq malugigiga. Nalunngilara naartusut taamaattartut meerujooqqajaasartut, taamaappiartarunnaarnikuulluni uannut allaat ippinnarpoq, taamaakkusunngikkaluarlunga aqussinnaasaraluarlugu timersorsinnaannginnera assut meerujoorutigisalerpara. Eqqarsaatit uannut tunngasut ikkattuararsuanngoqqikkiartortutut malugivakka, imminut isiginera nikanartaleqqilluni, maluginiaannaleqqallunga, timima allannguutai nuannariunnaartarlugit. Depressionernerunngitsumilli atorpakka (nammineq ilikkarnikuuara qaqugukkut utertartoq qanoq innersorlu, taamaammat nalunngilara depression-iunngitsoq), taamaallaat piareersimasimanngilanga taamatut naartussallunga, eqqarsaatigeqqaarnikuugakkumi saperunnarnaviarnanga timima sungiusimammagu sunaaffali naartoq naalagaasoq tassunga atatillugu. Arnat naartullutik sungiusarsinnaasut usoreqaakka nuannaartunat. Uanga pisuttuarneq atuinnarpara. Iluaqutaasarpoq kisianni amigarisannik.

Imaanngitsoq naartunera nuannarinngikkiga, pilluarnaqaaq malugalugu (uattulli aallamatigisarpoq) alliartornera malugisinnaallugu paarisalernissaa erininaqaaq!